اسلام آباد،لاہور (این این آئی)پاکستان تحریک انصاف خیبر پختون خوا کے صدر اور سابق وزیر دفاع پرویز خٹک نے گاڑی موٹر وے کے گرین بیلٹ پر چڑھادی ۔ سوشل میڈیا پر وائرل ہونے والی ویڈیو میں دیکھا جاسکتا ہے ایک گاڑی اچانک گرین بیلٹ پر چڑھ جاتی ہے جس پر
سابق وزیردفاع پرویز خٹک بھی سوار ہیں ۔ پرویز خٹک کی گاڑی چڑھنے کے بعد ان کی گاڑی کے پیچھے ایک اور گاڑی بھی گرین بیلٹ پر چڑھ جاتی ہے ۔یاد رہے کہ اس وقت تحریک انصاف کے صوبائی صدر پرویزخٹک کی قیادت میں مرکزی قافلہ صوابی پہنچا تھا ۔دوسری جانبپاکستان تحریک انصاف کے چیئرمین عمران خان ہیلی کاپٹر کی بجائے چارٹر طیارے کے ذریعے لاہور سے اسلام آباد کے لئے روانہ ہوئے ۔ تفصیلات کے مطابق پارٹی میں اعلی سطحی مشاورت کے بعد عمران خان کو لاہور سے راولپنڈی پہنچانے کیلئے ہیلی کاپٹر کی بجائے چارٹر طیارے کے استعمال کا فیصلہ کیا گیا ۔ عمران خان کی روانگی سے قبل لاہور ائیر پورٹ پر نجی کمپنی سے حاصل کئے گئے چارٹر طیارے کی سکیورٹی سویپنگ کی گئی جس کے بعد عمران خان زمان پارک سے ائیر پورٹ کے لئے روانہ ہوئے ۔ زمان پارک سے روانگی کے موقع پر سکیورٹی کے انتہائی سخت انتظامات کئے گئے ۔ سکیورٹی خدشات کی وجہ سے عمران خان کے زمان پارک سے ائیر پورٹ تک روٹ پر زیرو ٹریفک رہی ۔
