ممبئی(نیوز ڈیسک) سانحہ پشاور کا غم اپنے دل میں بسائے بھارتی موسیقاروں نے گانا ریلیز کردیا ۔ بھارت کے نامور موسیقار سلیم مرچنٹ اور سلیمان مرچنٹ نے گذشتہ سال پشاور سانحہ میں شہید بچوں کیلئے ایک گانا بنایا ہے ۔ 16 دسمبر 2014 کو پشاور کے آرمی پبلک سکول پر دہشتگردوں نے حملہ کیا تھا جس کے نتیجے میں ڈیڑھ سو سے زائد افراد اپنی جانوں سے محروم ہوئے جن میں اکثریت بچوں کی تھی ۔ سلیم اور سلیمان نے ”خالی پن “ حال میں ریلیز کیا جس میں دکھایا گیا ہے کہ دنیا بھر میں بچوں پر کتنا ظلم کیاجاتارہا ہے اور اگر اس دنیا سے تمام بچے ختم ہوگئے تو دنیا کتنی ویران اور خالی ہوجائیگی ۔ اپنے گانے کے حوالے سے سلیم کا ایک انٹرویو میں کہنا تھا کہ پشاور سانحہ میں بچوں نے گولیوں سے بچنے کیلئے بینچوں کے نیچے پناہ لی تھی اور ہمارا گانا اسی واقعے پر بنایا گیا ہے ۔ اس سانحہ سے متاثر ہو کر دونوں موسیقاروں نے یہ گانا ریلیز کیا جس میں دنیا بھر کے بچوں پر ہونیوالے ظلم کیخلاف پیغام دیا گیا ہے ۔