لاہور( این این آئی)سابق خاتون اول کی قریبی دوست فرحت شہزادی عرف فرح خان کی اسلام آباد میں کروڑوں روپے مالیت کی قیمتی جائیداد کا انکشاف ہوا ہے۔نجی ٹی وی نے ذرائع کے حوالے سے بتایا ہے کہ مطابق اسلام آباد کے پوش علاقے ایف 7 میں ایک ہزار مربع گز رقبے
پر پھیلا ہوا گھر ڈیڑھ سال قبل شندانا اعوان نامی شہری سے 20 کروڑ روپے میں خریدا گیا تھا۔نیب کی تحقیقاتی ٹیم کی طرف سے فرحت شہزادی اور شندانا اعوان کے درمیان کروڑوں روپے کی لین دین کا بھی پتا لگایا گیا ہے۔ اس حوالے سے نیب کی تحقیقاتی ٹیم نے شندانا اعوان کو 19جولائی کو طلبی کا نوٹس جاری کیا ہے جو کہ فرحت شہزادی کے کرایہ دار کو موصول ہوا۔فرحت شہزادی کے شوہر احسن گجر نے گھر کی خریداری کی تصدیق کرتے ہوئے کہا کہ یہ خریداری جائز کمائی اور ذرائع سے عمل میں آئی ہے۔ گھر کی ملکیت میں تبدیلی قانونی طور پر سی ڈی اے کے ذریعے ہوئی ہے اور اس پر مکمل ٹیکس ادا کیا گیا۔نیب میں طلبی کے معاملے پر احسن گجر نے کہا کہ ہمارے وکلا ء نیب لاہور میں جواب جمع کرائیں گے۔ انہوں نے مزید کہا کہ پاکستان ان کا ملک ہے، ان کا گھر، کاروبار اور سب کچھ یہاں ہے، اس لئے یقینی طور پر وہ واپس اپنے ملک آئیں گے۔
