لاہور(این این آئی)پاکستان مسلم لیگ (ن) کے رکن پنجاب اسمبلی بلال یاسین قاتلانہ حملے میں شدید زخمی ہو گئے،بلال یاسین داتا دربار کے علاقے میں کسی لیگی کارکن سے مل کر واپس آرہے تھے کہ موہنی روڈ پر مبینہ طور پر دو موٹر سائیکل سواروں نے ان پر فائرنگ کی جس کے بعد انہیں شدید زخمی حالت میں میو ہسپتال منتقل کر دیا گیا،اطلاع ملتے ہی پولیس کے اعلیٰ افسران بھاری نفری کے ہمراہ جائے وقوعہ پر پہنچ گئے،
اطلاع ملتے ہی لیگی رہنما، اہل خانہ،عزیز و اقارب اور کارکنان میو ہسپتال پہنچ گئے،وزیراعلیٰ پنجاب سردار عثمان بزدار نے واقعہ کا نوٹس لیتے ہوئے آئی جی پنجاب سے رپورٹ طلب کر لی۔بتایاگیا ہے کہ مسلم لیگ (ن) کے متحرک رہنما و رکن پنجاب اسمبلی بلال یاسین داتا دربار کے علاقے میں کسی کارکن سے ملنے اس کے گھر گئے تھے،بلال یاسین موٹرسائیکل پر کسی کے ساتھ گئے تھے اور پیچھے بیٹھے ہوئے تھے کہ واپسی پر موہنی روڈ پر مبینہ طور پر دو موٹرسائیکل سواروں نے ان پر فائرنگ کر دی جس سے بلال یاسین شدید زخمی ہو گئے۔انہیں فوری طور پر میو ہسپتال منتقل کردیاگیا۔اطلاع ملتے ہی پولیس کے اعلیٰ افسران بھی بھاری نفری کے ہمراہ پہنچ گئے۔ پولیس افسران کے مطابق عینی شاہدین کے بیانات قلمبند کر لئے گئے ہیں اور جائے وقوعہ سے سی سی ٹی وی فوٹیجز بھی حاصل کی جارہی ہیں۔ بلال یاسین جن راستوں سے آئے ان تمام راستوں کی بھی سی سی ٹی وی فوٹیجز حاصل کر رہے ہیں جبکہ بلال یاسین کے ساتھ موجود شخص سے بھی آگاہی حاصل کی جارہی ہے۔ اور جلد ملزمان کو گرفتار کر لیاجائے گا۔ بلال یاسین پر قاتلانہ حملے کی اطلاع ملتے ہی لیگی رہنما،ان کے اہل خانہ، عزیز و اقارب اورحلقے کے لوگوں کی بڑی تعداد ہسپتال پہنچ گئی۔ایم ایس میو ہسپتال ڈاکٹرافتخار کے مطابق بلال یاسین کو تین گولیاں لگیں جن میں سے دو ان کے پیٹ جبکہ ایک گولی ان کی ٹانگ میں لگی۔
دوسری جانب وزیر اعلیٰ پنجاب سردار عثمان بزدار نے مسلم لیگ(ن) کے رکن اسمبلی بلال یاسین پر حملے کا نوٹس لیتے ہوئے آئی جی پنجاب سے واقعہ کی رپورٹ طلب کرلی ہے۔مسلم لیگ(ن) کی نائب صدر مریم نواز نے اپنی ٹوئٹ میں کہا کہ خدا کا شکرہے بلال یاسین کی زندگی محفوظ رہی۔دعا ہے کہ خداکی ذات بلال یاسین کوجلد صحتیابی دے۔
