یریووان(آن لائن، این این آئی)آرمینیا اور آذربائیجان کی سرحد پر شدید مسلح جھڑپیں ہوئی ہیں۔ ان جھڑپوں کو گزشتہ سال کی چوالیس روزہ جنگ کے بعد سے اب تک کی بد ترین لڑائی قرار دیا جا رہا ہے۔ دونوں ممالک کی فوجوں نے ایک دوسرے پر
توپ خانے کے استعمال کے الزام لگائے ہیں۔ ان جھڑپوں میں ہلاک شدگان کی تعداد کے بارے میں متضاد اعداد و شمار سامنے آئے ہیں۔ آرمینیائی ذرائع کے مطابق اس لڑائی میں آرمینیا کے پندرہ فوجی مارے گئے۔میڈیا ذرائع کے مطابق کئی فوجی مرنے کے بعد آرمینیا نے روس سے مدد مانگ لی، دریں اثناء یریوان میں آرمینیائی حکومت نے کہا ہے کہ آذربائیجان کے ساتھ مسلح جھڑپوں کے بعد ماسکو کی مدد سے اب ایک جنگ بندی معاہدہ طے پا گیا ہے۔ میڈیارپورٹس کے مطابق دارالحکومت یریوان سے آرمینیا کی وزارت دفاع کے جاری بیان میں کہا گیا کہ روس کی ثالثی میں جنگ بندی پر اتفاق ہوگیا ہے، آرمینیا کی مشرقی سرحد پر صورتحال اب نسبتا مستحکم ہے۔رپورٹس کے مطابق آذربائیجان اور آرمینیا کی افواج کے درمیان گزشتہ روز جھڑپیں ہوئی تھیں۔ اس حوالے سے آرمینیا کی وزارت دفاع نے کہا تھا کہ آذربائیجان کی فوج کے حملے میں متعدد آرمینین فوجی ہلاک اور زخمی ہوئے ہیں۔واضح رہے کہ آرمینیا اور آذربائیجان کے درمیان ایک سال پہلے بھی روس نے ثالثی کرائی تھی۔
