جدہ۔۔۔۔۔سعودی عرب کے ساحلی شہر جدہ میں سینکڑوں لاوارث گاڑیوں کی وجہ سے شہریوں کو پریشانی اور پارکنگ کے مسائل کا سامنا ہے۔عرب نیوز ویب سائٹ کے مطابق جدہ میں گندی، زنگ آلودہ اور ناکارہ گاڑیاں گلیوں میں کھڑی نظر آتی ہیں۔سینکڑوں کی تعداد میں لاوارث گاڑیوں کی وجہ سے شہریوں کو رہائشی علاقوں میں پارکنگ کے مسائل کا سامنا ہے۔ویب سائٹ کے مطابق شہریوں کو ان گاڑیوں کی وجہ سے پارکنگ کے علاوہ سیاحتی شہر کی خوبصورتی متاثر ہونے پر بھی تشویش ہے۔
اب ان گاڑیوں کے مالکان کو جرمانے کا ٹکٹ جاری کیا جاتا ہے لیکن اس اقدام سے بھی معمولی فرق پڑا ہے۔مقامی رہائشی محمد الہمدانی کے مطابق: ’علاقے میں پارکنگ کے لیے خالی جگہ تلاش کرنا بہت مشکل کام ہے، جس میں پارک جیسے عوامی مقامات بھی شامل ہیں۔‘اس کے علاوہ یہ گاڑیاں حشرات اور کیڑے مکوڑوں کا مسکن بھی بن جاتی ہیں۔اطلاعات کے مطابق سعودی عرب میں سب سے زیادہ لاوارث گاڑیاں جدہ میں ہیں۔ بعض مقامی شہری حکام پر اس مسئلے سے نمٹنے میں ناکامی کا الزام لگاتے ہیں۔سال 2013 میں ایسی ہی نو سو گاڑیوں کو سڑکوں سے ہٹایا گیا تھا۔اس وقت شہر کے ترجمان نے عرب نیوز کو بتایا تھا کہ ان میں سے بعض کاروں کو جرائم میں بھی استعمال کیا گیا تھا لیکن زیادہ تر پرانی ناکارہ کاریں تھیں اور ان کے مالکان مہنگی مرمت کی وجہ سے ان کو سڑکوں پر لاوارث چھوڑ دیتے ہیں۔