اسلام آباد (این این آئی) وزیر اعظم عمران خان نے کہا ہے کہ 12 ربیع الاول کی تقریب پاکستان کی تاریخ کی سب سے بڑی تقریب ہوگی،رحمتہ اللعالمین اتھارٹی کے ذریعے پوری دنیا کو آپ ؐ کی سیرت کی آگاہی دی جائیگی،

اتھارٹی کے ذریعے حضور پاکؐکی سیرت کی روشنی میں نوجوانوں کی کردار سازی پر توجہ دی جائیگی،اتھارٹی کے ذریعے نوجوان نسل کو مسلمانوں کی تاریخ اور اسلامی انقلاب کے پہلوؤں سے روشناس کرایا جائے گا۔ جمعرات کو وزیرِ اعظم عمران خان کی زیرِ صدارت رحمتہ اللعالمین اتھارٹی پر پیش رفت اور 12 ربیع الاول کی تیاریوں پر جائزہ اجلاس ہوا جس میں وزیرِ اعظم کو عید میلاد النبی ؐ کی تقریب کی تیاریوں کے حوالے سے تفصیلی طور پر آگاہ کیا گیا،اسکے علاوہ وزیرِ اعظم کو رحمتہ اللعالمین سکالرشپ کے حوالے سے بھی بریف کیا گیا۔بتایاگیاکہ رحمتہ اللعالمین سکالر شپ طلباء و طا لبات کو نیڈ بیس اور میرٹ بیس پر دیا جائے گا،سکالر شپ حضور ؐ کی حیات اور سیرت پر تحقیق کرنے والے طلباء اور طالبات کیلئے مختص کیا گیا ہے، بتایاگیاکہ پی ٹی وی اور ریڈیو پاکستان پر آل پاکستان نعت مقابلوں کا انعقاد کیا گیا۔ وزیر اعظم نے کہاکہ مقابلوں میں پورے پاکستان سے نعت خوانوں نے شرکت کی۔اجلاس میں وفاقی وزراء فواد احمد چوہدری، پیر نور الحق قادری، شفقت محمود، معاونینِ خصوصی ڈاکٹر شہباز گِل، ڈاکٹر ارسلان خالد اور سینیٹر فیصل جاوید نے شرکت کی۔