ریاض (این این آئی)سعودی عرب میں جنرل ڈائریکٹریٹ آف پاسپورٹس نے غیر ملکی مقیمین کے شناختی کارڈزکی مدت میں خود کار طریقے سے توسیع کا عمل شروع کر دیا ہے۔ میڈیارپورٹس کے مطابق فیصلے کا اطلاق تجارت اور صنعت کے شعبوں میں نجی سیکٹر کے ان کارکنان پر ہو گا جن کے کارڈز کی تاریخ ختم ہو چکی ہے یا پھر 18 مارچ 2020 سے 30 جون 2020 کے درمیان ختم ہونے والی ہے۔

یہ توسیع تین ماہ کے لیے ہے اور اس کی کوئی فیس نہیں لی جائے گی۔یہ اقدام سعودی حکومت کی ان کوششوں کا حصہ ہے جو وہ کرونا وائرس کے سبب شہریوں اور غیر ملکی مقیمین پر پڑنے والے مالی اور اقتصادی دبا کے اثرات کو کم کرنے کے واسطے کر رہی ہے۔پاسپورٹس ڈائریکٹریٹ نے واضح کیا کہ مقیم افراد کے شناختی کارڈزکی مدت میں مذکورہ توسیع خود کار طور پر بنا کسی فیس کے عمل میں لائی جا رہی ہے اور اس کے لیے ڈائریکٹریٹ کے دفتر سے رجوع کرنے کی ضرورت باقی نہیں رہی۔ اس توسیع سے مستفید ہونے والوں کو موبائل پر ٹیکسٹ میسج کے ذریعے مطلع کر دیا جائے گا۔ڈائریکٹریٹ کے مطابق فیصلے کا اطلاق تمام غیر ملکی مقیمین پر ہو گا خواہ وہ اس وقت سعودی عرب میں موجود ہوں یا نہ ہوں۔