قلات(آن لائن)قلات میں سردی کی لہر برقرار، شدید سردی سے ہر شے جم گیا، خون جمادینے والی سردی میں بھی گیس مکمل طور پر غائب،عوام کو شدید مشکلات کا سامنا، گزشتہ روز گورنر بلوچستان کی جانب سے گیس حکام کو گیس فراہمی یقینی بنائی جانے کے احکامات پر بھی جی ایم کی ہٹ دھرمی برقرار۔ گیس فراہمی ممکن نہ ہوئی۔
تفصیلات کے مطابق بلوچستان کا علاقہ قلات جوکہ ملک کا سب سے سرد ترین علاقہ شمار ہوتا ہے۔جہاں پر محکمہ موسمیات قلات کے انچارج شیراحمد مینگل کے مطابق گزشتہ چوبیس گھنٹوں کے دوران درجہ حرارت منفی گیارہ ریکارڈ کیا گیا جبکہ سردی کی شدت میں مزید اضافے کا بھی امکان ہے۔ دوسری جانب شدید سردی میں گیس پریشر گزشتہ کئی ہفتوں سے مکمل غائب ہے جس کے باعث عوام کو شدید مشکلات کا سامنا ہے۔سردی کی وجہ سے لوگ گھروں میں محصور ہوکر رہ گئے ہیں گھریلو صارفین خاص کر خواتین کو امور خانہ داری میں بھی مشکلات کا سامنا ہے۔ خشک لکڑیاں بھی ناپید اور گیلے لکڑیاں بھی مہنگے داموں فروخت کی جارہی ہے جوکہ عوام کی دسترس سے باہر ہے۔گیس بندش کے حوالے سے حکومت اور ذمہ داران نے چپ کا روزہ رکھا ہے۔عوامی حلقوں نے اعلی حکام سے پر زور مطالبہ کیا ہے کہ قلات میں خون جمادینے والی شدید سردی میں گیس پریشر بلا تعطل فراہمی یقینی بنائی جائے۔
