بہاولپور: نوشہرہ کے گاؤں مندھل میں ایک شخص اور اس کے دو بیٹوں نے معمولی تلخ کلامی پر ایک عورت پر مبینہ طور پر کتے چھوڑ دیے۔
پولیس کے مطابق بہاولپور سے 30 کلو میٹر دور مندھل گاؤں میں عبدالرزاق کی بکری اس کے رشتے دار محمد افضل کے گھر میں جا گھسی اور اسے لینے کے لیے رزاق کی بیٹی عذرا بی بی، افضل کے گھر گئی۔
اس موقع پر عذرا کی افضل اور اسکے دو بیٹوں خالد اور منیر سے تلخ کلامی بھی ہوئی جس کے بعد انہوں نے مبینہ طور پر عورت پر کتے چھوڑ دیے۔
کتے چھوڑے جانے کے باعث عورت کافی زخمی ہو گئی اور اسے فوری طور پر ٹی ایچ کیو ہسپتال احمد پور ایسٹ لے جایا گیا جہاں اس کا علاج جاری ہے۔
رزاق کی شکایت پر پولیس نے تینوں مبینہ ملزمان کے خلاف مقدمہ درج کر لیا ہے تاہم انہیں گرفتار نہیں کیا۔
منگل کو تینوں مبینہ ملزمان نے احمد پور ایسٹ کورٹ سے عبوری ضمانت حاصل کر لی۔
پولیس نے دعویٰ کیا ہے کہ ضمانت منسوخ ہونے پر ملزمان کو گرفتار کر لیا جائے گا۔
دوسری جانب وزیر اعلیٰ شہباز شریف نے واقعے کا نوٹس لیتے ہوئے پولیس سے رپورٹ طلب کر لی ہے۔
