ریاض(این این آئی) سعودی عرب میں سیاحت کے شعبے کے متعلقہ ذرائع نے واضح کیا ہے کہ مملکت میں داخلے کے واسطے سیاحتی ویزوں کے بنیادی نظام میں ایک پیراگراف شامل ہے جو امریکا، برطانیہ اور شینگن ممالک کے ویزے رکھنے والے افراد کا سعودی عرب میں داخلہ آسان بناتا ہے خواہ یہ افراد کسی بھی ملک کی شہریت کے حامل ہوں۔مذکورہ ذرائع نے عرب ٹی وی سے خصوصی گفتگو میں بتایا کہ تجارتی اور سیاحتی ویزوں کے حامل افراد کو مملکت پہنچنے پر فوری طور پر ویزے کے حصول کی اجازت ہو گی۔ شرط یہ ہے کہ سعودی عرب

کی سرزمین پر پہنچنے سے قبل آنے والا شخص اْس ملک میں داخل ہو چکا ہو جہاں سے اسے ویزا پیش کیا گیا ہے۔ ساتھ ہی یہ کہ اس ویزے کی میعاد مذکورہ شخص کے مملکت سے واپس جانے تک ختم نہ ہو۔یاد رہے کہ سعودی عرب نے گذشتہ برس 27 ستمبر کو اعلان کیا تھا کہ وہ نئے ویزا نظام کے تحت دنیا بھر سے سیاحوں کے استقبال کا آغاز کر رہا ہے۔ اس نظام کے تحت سیاحوں کے لیے ایک سال کا ویزا نکلوانا ممکن ہو گا۔ اس ویزے کے مطابق انہیں ایک دورے کے دوران مملکت میں 90 روز تک قیام کی اجازت ہو گی۔