اسلام آباد(مانیٹرنگ ڈیسک)مقبوضہ کشمیر میں بھارتی فوج کی پیلٹ گن کا نشانہ بننے والے ایک 72 سالہ دکاندار محمد صدیق نے برطانوی خبر رساں ادارے سے بات کرتے ہوئے کہاکہ رواں اگست کی ایک دوپہر کو سری نگر کی پرانی مسجد سے نماز پڑھ کر نکلا تو ایک بھارتی فوجی نے تین مرتبہ مجھ پر پیلٹ گن چلائی جس کے نتیجے میں میں زخمی ہو گیا۔ بھارتی فوجی نے بغیر کسی لڑائی کے مجھ پر پیلٹ گن کے شیل فائر کیے۔
اس وقت وہاں آٹھ یا نو افراد جن میں بچے بھی شامل تھے، موجود تھے۔ محمد صدیق نے بتایا کہ ان بچوں کی ماؤں نے کہا کہ نہ کوئی جھگڑا ہے، نہ کچھ ہے پھر بھی بھارتی فوجی نے پیلٹ گن لگائی ہوئی ہے۔ محمد صدیق نے بتایا کہ جب میں زخمی ہوا تو کچھ لڑکے مجھے اپنی گاڑی میں ڈال کر ہسپتال لے گئے۔وہاں پہنچنے تک مجھے پانچ سے دس مرتبہ روکا گیا۔ واضح رہے کہ مقبوضہ وادی میں کرفیو کا آج 24واں روز ہے۔
