کراچی(این این آئی)کراچی چیمبرآف کامرس اینڈ انڈسٹری ( کے سی سی آئی ) کے صدر جنید اسماعیل ماکڈا نے کہا ہے کہ صحت، تحفظ اور ماحولیات سے متعلق اہم قوانین 1974سے نافذ ہیں جو بالکل جامع ہیں لیکن یہ امر باعث افسوس ہے کہ ان قوانین کے باوجود عوامی اور نجی اداروں کی کارکردگی

اس سلسلے میں خراب ہے جس کی وجہ صنعتی منیجرز اور صحت،تحفظ و ماحولیات کے ماہرین میں مختلف قوانین کے بارے میںمعلومات کا نہ ہونا ہے لہٰذا معلومات کے فقدان سے پیدا ہونے والے خلا کو کم کرنے کے لیے متعلقہ قواعد اور قوانین کو اچھی طرح سمجھنے کی ضرورت ہے۔یہ بات انہوں نے جمعرات کو مقامی ہوٹل میں منعقدہ 5ویں بین الاقوامی انوائرمنٹ، ہیلتھ و سیفٹی کانفرنس میں بطور مہمان خصوصی خطاب کرتے ہوئے کہی۔ اس موقع پر پروفیشنلز نیٹ ورک کے سی ای او محمود ترین، سی ایس آر کارکن عتییق الرحمان و دیگر ممتازشخصیات نے بھی خطاب کیا۔جنید ماکڈا نے کہاکہ صحت،تحفظ اور ماحولیات سے متعلق ایک درجن سے زائد قوانین موجود ہیں لیکن ان کا نفاذ انتہائی کمزور ہے۔انہوں نے زور دیا کہ تمام کاروباری اداروں کو لوگوںکی صحت اور حفاظت کو یقینی بنانے اور صحت مند ماحول کی فراہمی کو ترجیح دینا چاہیے۔پاکستان میں صنعتوں کواپنے ملازمین کے لیے کام کرنے کے مقام کو محفوظ بنانے اور ماحول میں بہتری لانے کے لیے کردار ادا کرنا چاہیے۔اچھاماحولیاتی عمل سے ہی اچھا کاروبار یقینی ہوگا ۔ماحول دوست ٹیکنالوجی کے ذریعے کاروبار کو فروغ دینے کے ساتھ ساتھ مصنوعات کے معیار اور تیاری کے عمل کو بہتر بنانے اور توانائی و قدرتی وسائل کو بچایا جاسکتا ہے۔انہوں نے کہاکہ پاکستان میں کمپنیوں کو ماحولیاتی صحت اور تحفظ کے پرگرامز میں سرمایہ کاری کرنے کی ضرورت ہے ۔انہوں نے کہاکہ تحفظ کاروبار کا ایک اہم پہلو ہے جس کی ادارے کی ہر سطح پر اچھی طرح وضاحت کرنے کی ضرورت ہے۔کمپنیوں کے سالانہ بورڈ اجلاسوں میں اس پر بہت زیادہ توجہ دینی چاہیے اور یہ تمام کاروباری اداروں کی توجہ کا مرکز ہونا چاہیے۔انہوں نے کہاکہ اس ضمن میں سرمایہ کاری پر غور کرنے کی ضرورت ہے

جونہ صرف بنیادی ڈھانچے بلکہ ایسے اداروں کی تعمیر کی ضرورت ہے جہاں ہر سطح پر صحت اور حفاظتی امور کی نگرانی ہونی چاہیے ۔انہوں نے کہاکہ کراچی چیمبر آف کامرس اینڈ انڈسٹری ایک ذمہ دار کارپوریٹ شہری کے طور پر شعور بیدار کرنے اور صحت،تحفظ اور ماحولیاتی خرابیوں کو دور کرنے کے پروگرامز پر عمل درآمد کے حوالے سے اہم کردار ادا کررہاہے۔

موضوعات:صدر کراچی چیمبر