لاہور (آن لائن) پنجاب حکومت کی جانب سے وزراء کے لیے 77 نئی گاڑیاں خریدنے کے فیصلے کے خلاف قرارداد پنجاب اسمبلی میں جمع کروا دی گئی۔ قرارداد مسلم لیگ (ن) کے رکن پنجاب اسمبلی میاں مناظر حسین رانجھا کی جانب سے جمع کرائی گئی۔ جس میں کہا گیا ہے کہ حکومت پنجاب کی جانب سے ریاست مدینہ کے سنہری اصول کھل کر سامنے آ گئے۔پنجاب حکومت نے وزراء کے لیے 77 نئی گاڑیاں خریدنے کا فیصلہ کیا ہے۔

جس کے لیے سرکاری خزانے سے 17 کروڑ 47 لاکھ روپے کی خطیر رقم خرچ ہوگی۔ایک جانب حکومت کفایت شعاری کا نعرہ لگاتی ہے تو دوسری جانب اپنے وزراء کے لیے شاہ خرچیوں کا سلسلہ جاری ہے۔حکومت کے اس دوغلے پن پر عوام میں سخت تشویش اور غم وغصہ پایا جارہا ہے۔ قرار داد میں مطالبہ کیا گیا ہے کہ قرارداد میں حکومت سے مطالبہ کیا گیا ہے کہ وہ اپنوں کو نوازنے کی بجائے مہنگائی میں پسی ہوئی عوام کو ریلیف فراہم کرے۔