مقبوضہ بیت المقدس (این این آئی)اقوام متحدہ نے فلسطین کے علاقے غزہ کی پٹی میں قطر کے تعاون سے شروع کیے گئے ترقیاتی منصوبوں کے ذریعے غزہ کے عوام میں 3 ہزار ملازمتوں کا اعلان کیا ہے۔ اطلاعات کے مطابق اقوام متحدہ کے ترقیاتی ادارے اور قطر نے ایک مشترکہ معاہدے کی منظوری دی ہے، اس معاہدے کے تحت قطر غزہ میں 7 ملین ڈالر کے ترقیاتی پروگرام شروع کریگا۔اقوام متحدہ کے عہدیداروں

نے کہا ہے کہ غزہ میں صحت، تعلیم، بنیادی ڈھانچے، بحری تحفظ اور دیگر شعبوں میں ترقیاتی منصوبے شروع کئے جائینگے، ان منصوں کی مدت 6 سے 9 ماہ تک ہوگی اور ان سے غزہ کے عوام کو 3 ہزار ملازمتیں ملیں گی۔غزہ میں اقوام متحدہ کے پروگرام منیجر نے کہا کہ ترقیاتی منصوبوں کے ذریعے غزہ میں نوجوانوں بالخصوص جامعات کے نئے فضلاء کو ترجیحی بنیادوں پر ملازمتیں مہیا کی جائینگی۔