ممبئی (نیوزڈیسک)بھارتی بیڈمنٹن سٹار جوالاگٹا نے بیڈمنٹن چھوڑ کر بالی ووڈ کا حصہ بننے کا فیصلہ کر لیا، بھارت کی سابق نمبر ایک بیڈمنٹن پلیئران دنوں فلموں کے سکرپٹ پڑھنے میں مصروف ہیں۔ جوالا گٹا نے آج سے 12 سالہ قبل بیڈمنٹن کی دنیا میں شہرت حاصل کی اور دو سال قبل تک وہ بھارت کی نمبر ایک بیڈمنٹن کھلاڑی تھیں تاہم سائنا نہوال کے آنے کے بعد اور بڑھتی عمر کی وجہ سے وہ اپنی یہ پوزیشن برقرار نہیں رکھ سکیں۔ جوالا گٹا اب انٹرنیشنل بیڈمنٹن سے ریٹائر ہو رہی ہیں اور انہوں نے فلم انڈسٹری کو اپنا مرکز بنانے کا فیصلہ کیا ہے۔ جوالا اس سے قبل تیلوگو زبان میں بننے والی ایک فلم میں اداکاری کر چکی ہیں تاہم انہیں آج تک کسی بالی ووڈ فلم میں شامل نہیں کیا گیا۔ ایک انٹرویو میں انہوں نے اس بات کی تصدیق کی کہ وہ جلد ہی کھیل کی دنیا چھوڑ کر فلم انڈسٹری سے وابستہ ہو جائیں گی۔ اپنے کھیل کے حوالے سے جوالا نے کہا کہ بھارت میں ایک لڑکی کا کھیل کے شعبے میں ترقی کرنا بہت مشکل ہے۔ قدامت پسند لوگوں کے ساتھ ساتھ اس شعبے میں موجود مرد کھلاڑی بھی کسی عورت کو خود سے زیادہ کامیابیاں سمیٹتے نہیں دیکھ سکتے۔