تیونس سٹی(این این آئی)تیونس کے مفرورسابق صدر زین العابدین بن علی ایک ایسے شخص کے سسر بن گئے جو2011ء میں ان کی برطرفی کیلیے پیش پیش رہاہے۔عرب ٹی وی کے مطابق ذرائع ابلاغ میں یہ خبر سامنے آئی کہ تیونس کے راپ موسیقار کادوریم نے زین العابدین بن علی کی صاحبزادی نسرین بن علی سے شادی کرلی ہے۔ اس خبر کے سامنے آنے کے بعد شہریوں نے
سوشل میڈیا پر کادوریم کی ایک سابقہ فوٹیج دوبارہ نشر کی جس میں انہیں زین العابدین کی طرفی کی حمایت کرتے دیکھا اور سنا جاسکتا ہے۔ تیونس میں زین العابدین بن علی کے خلاف عوامی بغاوت کے دوران کادوریم بھی ان کے پاس گئے اور انہیں کہا تھا کہ ملک کے اندر اورباہر ہرطرف ایک ہی مطالبہ ہے کہ زین العابدین بن علی حکومت چھوڑ دیں۔ لہٰذا آپ فوری طور پراقتدا سے الگ ہوجائیں۔ عرب بہاریہ کے دوران بن علی کی برطرفی میں کادرویم پیش پیش رہے تھے۔تیونس کے سوشل میڈیا پر پرانی فوٹیج دوبارہ نشر ہونے پر کادوریم کو دفاعی پوزیشن اختیار کرنا پڑی ۔ ان کا کہنا تھا کہ جب انہوں نے بن علی کی برطرفی کی حمایت کی تھی تو اس وقت ہرطرف ایک ہی آواز تھی۔ لوگوں کے ذہن یرغمال بنا لیے گئے تھے۔ میں بھی اسی نفرت اور بغض کا شکار ہوگیا تھا۔ مگر وقت گذرنے کے ساتھ حقیقت آشکار ہوگئی۔ دیگر نوجوانوں کی طرح میں بھی چاہتا تھا کہ ملک میں لوگوں کو زیادہ سے زیادہ آزادی حاصل ہو اور ملک میں کرپشن کا خاتمہ ہو۔ مگر ہمارے یہ خواب پورے نہیں ہوئے۔ زین العابدین بن علی کی برطرفی کے بعد تیونس کے حالات مزید بگڑ گئے ۔
