لاہور (نیوز ڈیسک) زمبابوے کرکٹ بورڈ نے پاکستان کا دورہ منسوخ کر نے کی خبر کو غلطی قرار دیا ہے اور کہا ہے کہ دورہ پاکستان کیلئے تبادلہ خیال جاری ہے۔ تفصیلات کے مطابق کرکٹ زمبابوے کی جانب سے جاری بیان میں کہا گیا ہے کہ زمبابوے کرکٹ بورڈ کی ایگزیکٹو کمیٹی کا اجلاس جاری ہے جس میں دورہ پاکستان کیلئے تبادلہ خیال جاری ہے اور اس سے متعلق ابھی حتمی فیصلہ نہیں کیا گیا۔
واضح رہے کہ کرکٹ زمبابوے کی جانب سے 15 منٹ کے دوران یہ دوسرا بیان جاری کیا گیا ہے۔ اس سے قبل دیئے گئے بیان میں زمبابوے کرکٹ بورڈ کا کہنا تھا کہ موجودہ حالات میں پاکستان کا دورہ ممکن نہیں ہے۔ ذرائع کے مطابق زمبابوے کرکٹ بورڈ نے دورہ منسوخی کی پریس ریلیز کو بڑی غلطی قرار دیا اور کہا کہ ایسا کوئی فیصلہ نہیں کیا گیا۔