اسلام آباد (نیوز ڈ یسک)پنجاب حکومت نے نئی گاڑیوں کی خریداری کیلئے ڈیلیوری سے قبل رجسٹریشن لازمی قرار دے دی ہے،
اب کوئی بھی نئی گاڑی سرکاری رجسٹریشن کے بغیر شوروم سے باہر نہیں جاسکے گی۔ میڈیا کے مطابق ڈائریکٹرجنرل ایکسائز پنجاب عمر شیر چٹھہ کی ہدایت پر نئی گاڑیوں کی رجسٹریشن سے متعلق نئی پالیسی فوری طور پر نافذ کردی گئی ہے۔
نئی پالیسی کے تحت تمام آٹو موبائل کمپنیوں، مجاز ڈیلرشپس اور موٹر برانچ حکام کو پابند کیا گیا ہے کہ نئی گاڑی کی رجسٹریشن خریدار کو ڈیلیوری سے پہلے مکمل کی جائے۔ حکام کے مطابق کہ پنجاب کے کمپیوٹرائزڈ قومی شناختی کارڈ رکھنے والے خریداروں کو اب مکمل رجسٹرڈ گاڑی، سرکاری نمبر پلیٹ اور تمام قانونی دستاویزات کے ساتھ فراہم کی جائے گی، جس سے انہیں بعد میں ایکسائز دفاتر جانے کی ضرورت نہیں رہے گی۔
اس مقصد کے لیے مجاز ڈیلرشپس کو ڈیلر وہیکل رجسٹریشن سسٹم کے تحت رجسٹریشن کا اختیار دیا جائے گا، گاڑیاں بنانے والی کمپنیوں کو اپنی تمام مجاز ڈیلرشپس کی فہرست ایکسائز ڈیپارٹمنٹ کو فراہم کرنے کی ہدایت کی گئی ہے، جس کے بعد انہیں ڈی وی آر ایس لائسنس جاری کیے جائیں گے۔ مزید برآں ڈیلرشپس ہر گاڑی کی رجسٹریشن پر دو ہزار روپے سروس فیس وصول کرتے ہیں، فیس میں بھی معمولی اضافے کی تجویز زیر غور ہے تاکہ رجسٹریشن کے ڈیجیٹل نظام کو زیادہ مؤثر بنایا جاسکے۔
