اسلام آباد (نیوز ڈ یسک)بالی ووڈ اور جنوبی بھارتی فلموں کی معروف اداکارہ کاجل اگروال نے سلمان خان کے ساتھ کام کرنے کے اپنے تجربے اور فلمی صنعت میں وقت کی پابندی کے حوالے سے دلچسپ گفتگو کی ہے۔
ایک پوڈکاسٹ میں شرکت کے دوران کاجل اگروال کا کہنا تھا کہ جنوبی بھارتی فلم انڈسٹری میں کام کا نظام زیادہ منظم ہے اور وہاں شیڈول کی پابندی کو خاص اہمیت دی جاتی ہے۔ ان کے مطابق بالی ووڈ بھی اس حوالے سے ساوتھ انڈین انڈسٹری سے بہت کچھ سیکھ سکتا ہے۔اداکارہ نے بتایا کہ وہ ہمیشہ مقررہ وقت پر شوٹنگ کے لیے پہنچنے کی عادی رہی ہیں، لیکن سلمان خان کے ساتھ کام کے دوران انہیں سب سے زیادہ انتظار کرنا پڑا۔انہوں نے کہا کہ کئی مواقع پر سلمان خان دوپہر یا شام کے وقت سیٹ پر پہنچتے تھے، جبکہ وہ صبح سے ہی وہاں موجود ہوتی تھیں۔ کاجل کے مطابق انتظار کے دوران وہ اپنا وقت ضائع کرنے کے بجائے سیٹ پر موجود جم میں ورزش کر لیا کرتی تھیں۔
کاجل اگروال نے مزید کہا کہ چونکہ وہ جنوبی بھارتی فلم انڈسٹری کے نظم و ضبط اور وقت کی سخت پابندی کی عادی ہیں، اس لیے بالی ووڈ کا یہ انداز ان کے لیے مختلف تجربہ تھا۔
