اسلام آباد (نیوز ڈیسک)خیبرپختونخوا حکومت نے صوبے کے سرکاری پنشنرز کو مالی ریلیف فراہم کرتے ہوئے پنشن میں 7 فیصد اضافے کی منظوری دے دی ہے۔ اس فیصلے کا باقاعدہ نوٹیفکیشن بھی جاری کر دیا گیا ہے۔

اعلامیے کے مطابق پنشن میں کیا گیا یہ اضافہ یکم جولائی 2026 سے نافذ العمل ہوگا اور اس کا اطلاق صوبائی حکومت کے تمام اہل پنشنرز پر ہوگا۔محکمہ خزانہ کی جانب سے جاری نوٹیفکیشن میں بتایا گیا ہے کہ اضافے کا حساب 30 جون 2026 تک حاصل ہونے والی نیٹ پنشن کی بنیاد پر کیا جائے گا۔ اس کے علاوہ یکم جولائی 2026 یا اس کے بعد ریٹائر ہونے والے ملازمین بھی اس اضافے کے مستحق ہوں گے۔حکومت نے واضح کیا ہے کہ یہ سہولت فیملی پنشن اور کمپیشنٹ الاؤنس حاصل کرنے والے افراد پر بھی یکساں طور پر لاگو ہوگی، جبکہ بیرون ملک مقیم وہ پنشنرز جو مقررہ شرائط پوری کرتے ہیں، وہ بھی اس اضافے سے فائدہ اٹھا سکیں گے۔نوٹیفکیشن میں یہ وضاحت بھی کی گئی ہے کہ 7 فیصد اضافہ پہلے سے دی جانے والی کسی بھی خصوصی اضافی پنشن پر لاگو نہیں ہوگا۔خیبرپختونخوا حکومت کے اس فیصلے کو موجودہ معاشی حالات میں صوبے کے ریٹائرڈ ملازمین اور ان کے اہل خانہ کے لیے ایک اہم مالی سہولت قرار دیا جا رہا ہے۔