اسلام آباد (نیوز ڈیسک) متحدہ عرب امارات نے مخصوص ممالک کے شہریوں کے لیے ویزا آن آرائیول کی پالیسی سے متعلق نئی ہدایات اور شرائط جاری کر دی ہیں۔

نئی پالیسی کے تحت اہل مسافر یو اے ای پہنچنے پر 14 یا 60 روزہ ویزا حاصل کر سکیں گے۔دبئی کی جنرل ڈائریکٹوریٹ آف آئیڈینٹیٹی اینڈ فارنرز افیئرز (GDRFA) کے مطابق اس سہولت سے بھارت، انڈونیشیا، ویتنام، تھائی لینڈ، فلپائن، کینیا اور جنوبی افریقہ کے شہری، ان کے اہل خانہ سمیت، فائدہ اٹھا سکتے ہیں۔ تاہم اس کے لیے ضروری ہے کہ درخواست گزار کے پاس عام پاسپورٹ کے ساتھ کسی منظور شدہ ملک کا مؤثر رہائشی پرمٹ بھی موجود ہو۔

اتھارٹی نے واضح کیا ہے کہ ویزا آن آرائیول صرف ان مسافروں کو جاری کیا جائے گا جو مقررہ شرائط پر پورا اتریں اور ان کے سفری دستاویزات مکمل اور کارآمد ہوں۔حکام کے مطابق اس سہولت کا مقصد بین الاقوامی مسافروں کے لیے سفری عمل کو مزید آسان بنانا اور متحدہ عرب امارات میں سیاحت و کاروباری سرگرمیوں کو فروغ دینا ہے۔اعداد و شمار کے مطابق سال 2026 کے ابتدائی چھ ماہ کے دوران اس پروگرام کے تحت مجموعی طور پر 73 ہزار 551 ویزے جاری کیے گئے، جو ویزا آن آرائیول اسکیم کی بڑھتی ہوئی مقبولیت کو ظاہر کرتے ہیں۔