اسلام آباد (این این آئی)پاکستان مسلم لیگ (ن) کی ترجمان سابق وزیر اطلاعات مریم اورنگزیب نے کہا ہے کہ سابق وزیر اعظم محمد نواز شریف فی الحال کوئی سیاسی ملاقاتیں نہیں کررہے۔ ایک بیان میں انہوں نے کہا کہ میڈیا کے بعض حصوں میں پارٹی قائد سے ملاقاتوں کے حوالے سے آنے والی اطلاعات حقائق پر مبنی نہیں اور نہ ہی ضمنی الیکشن کے بارے میں کوئی ملاقات ہوئی ہے۔ انہوں نے کہا کہ بغیر تصدیق ایسی بے بنیاد اطلاعات پھیلانے والوں کو چاہئے کہ
وہ بیگم کلثوم کے غم میں سوگوار شریف خاندان کی پرائیویسی اور مشرقی اقدار کااحترام کریں۔ انہوں نے کہاکہ محمد نوازشریف ، مریم نواز ، اور شریف خاندان کے افراد کلثوم نواز کی نا گہانی موت پہ سوگوار ہیں۔ آپ سب سے درخواست ہے کہ اِس صورتحال کا احترام کیا جانا چاہیے انہوں نے کہاکہ ایک بار پھر واضح کیاجاتا ہے کہ ملاقاتوں اور بیانات کے بارے میں پارٹی ترجمان میڈیا کو آگاہ رکھیں گیں لہذا اس ضمن میں قیاس آرائیوں سے پرہیز کیا جائے۔
