لاہو ر( این این آئی) مسلم لیگ (ن) نے سابق وزیر اعظم نواز شریف کو اہلیہ کے چہلم تک جیل منتقل نہ کرنے کے مطالبے کی قرارداد پنجاب اسمبلی سیکرٹریٹ میں جمع کرا دی ۔(ن) لیگ کے رکن اسمبلی میاں نصیر احمد کی طرف سے جمع کروائی گئی قرار داد میں کہا گیا ہے کہ معزز ایوان میاں نواز شریف کی اہلیہ کی وفات پر دلی افسوس کا اظہار اور ان کی جمہوریت کے لیے خدمات پر خراج تحسین پیش کرتا ہے۔کلثوم نواز کی وفات شریف خاندان کے لیے
کسی المیے سے کم نہیں۔ شریف خاندان کی ملک کے لیے خدمات کو ملحوظ خاطر رکھا جائے۔ یہ ایوان حکومت سے اپیل کرتا ہے کہ انسانی ہمدردی کی بناء پر نواز شریف کی پیرول پر رہائی بڑھائی جائے، نواز شریف کو واپس اڈیالہ جیل منتقل نہ کیا جائے۔ جاتی امرا کو بیگم کلثوم نواز کے چہلم تک سب جیل قرار دیا جائے۔ اس کے علاوہ نواز شریف کو کلثوم نواز کی تعزیت کے لیے آنے والے ملکی اور غیر ملکی مہمانوں سے ملنے کی اجازت دی جائے۔
