راولپنڈی(سی پی پی) وزیر ریلوے شیخ رشید نے 30 دسمبر تک ریلوے کو بہترین بنانے کا اعلان کرتے ہوئے کہا ہے کہ ایک سال میں ریلوے کے 42 ملین کا خسارہ ختم کریں گے۔راولپنڈی ریلوے اسٹیشن کے دورے کے موقع پر میڈیا سے بات کرتے ہوئے شیخ رشید کا کہنا تھا کہ وزیراعظم عمران خان نے ہمیں ریلوے کا جو ٹاسک دیا ہے اسے پورا کریں گے اور وعدہ کرتا ہوں بھیس بدل کر گاڑیوں کو چیک کروں گا۔

شیخ رشید نے کہا کہ ریلوے میں وائی فائی ہوگا، 24 گھنٹے پنکھے اور لائٹس ہوں گی، خزانہ خالی ہے تاہم دستیاب وسائل سے ہی کام لیں گے اور کوشش ہوگی کرایہ بڑھانے کے بجائے سستی ٹرین چلائیں۔ وزیر ریلوے نے مزید کہا کہ سی پیک پاکستان کی ریڑھ کی ہڈی ہے، ریلوے کا محکمہ 40سے 42ارب روپے کے خسارے میں ہے، ہمارا سب سے بڑا ٹاسک خسارے کوختم کرنا ہے،ریلوے کو ایک سال کے اندر خسارے سے نکالیں گے اور 42 ملین کا خسارہ ختم کریں گے اور 30 دسمبر تک ریلوے کو بہترین بناتے ہوئے کوئٹہ سے تفتان تک گیج بنائیں گے،ہمارے پاس وسائل نہیں پھر بھی کام کریں گے۔شیخ رشید نے کہا کہ ایک دو مچھلیاں سارے تالاب کو خراب کرتی ہیں تاہم کرپشن کے خلاف زیرو ٹالیرنس ہے بڑے بڑے بلڈرز نے محکمہ ریلوے کی زمین پر قبضہ کر لیا ہے، وزیر اعظم عمران خان سے ملاقات میں اپنی سفارشات پیش کریں گے، محکمہ ریلوے کی زمین واگزار کرانے کیلیے آرڈیننس جاری کرنے کی تجویز دوں گا۔شیخ رشید نے کہا کہ بہت سی ٹرینیں پرانی ہوگئیں، جنہیں اپ گریڈ کرنے کی ضرورت ہے،20دن میں 2ٹرینیں تیار کی گئی ہیں، ہم موہن جو دڑو تک ٹرین لے کر جائیں گے۔ مزدوروں نے دن رات کام کیا ہے، انہیں پانچ پانچ ہزار انعام دیں گے۔انہوں نے یہ بھی کہا کہ ریلوے کو مثالی بنانے کی کوشش کریں گے،ہمیں بہت سے چیلنجز کا سامنا ہے۔