اسلام آباد(مانیٹرنگ ڈیسک)صدر مسلم لیگ ن اورسابق وزیر اعلیٰ پنجاب شہباز شریف بھابھی بیگم کلثوم نواز کی میت لینے لندن پہنچ گئے،شہبازشریف گھر پہنچے تو نواز شریف کے بیٹے حسین نواز والدہ کی وفات پر چچا کے گلے لگ کر رو پڑے۔ میڈیا سے بات کرتے ہوئے شہباز شریف نے کہا کہ قوم سے درخواست ہے کہ کلثوم نواز کے لیئے دعا کرے ۔نواز شریف بہت دکھی ہیں جبکہ مریم نواز رو رہی تھیں، انہیں دلاسہ دیا ہے۔انہوں نے مزید کہا کہ پیرول پر رہائی کی

درخواست پر نوازشریف اور مریم نواز نے دستخط سے انکار کیا تو میں نے دستخط کیے، کلثوم نواز کی بیماری سے متعلق باتیں درد دل رکھنے والے کو زیب نہیں دیتیں۔نواز شریف اور ان کی بیٹی نے 109 سے زائد پیشیاں بھگتی ہیں مگر ان کے خلاف کرپشن کا کوئی ثبوت نہیں ملا، عدالتوں میں کیس چل رہے ہیں، امید ہے انصاف کا بول بالا ہو گا۔واضح رہے کہ آج لندن میں بیگم کلثوم نواز کی نماز جنازہ ادا کیا جائیگی جس کی بعد ان کی میت کو پاکستان کیلئے روانہ کردیا جائیگا۔