نیویارک (انٹرنیشنل ڈیسک) امریکا کی ریاست میساچوسٹس میں دو مقامی بچوں کو ڈوبنے سے بچانے کی کوشش کرنے والے سعودی طلبہ دریائے شکوپی میں غرق ہو کر اپنی جانوں سے ہاتھ دھو بیٹھے۔ امریکی ٹی وی کے مطابق یہ افسوس ناک واقعہ جمعے کے روز پیش آیا۔ جاں بحق ہونے والے دونوں طلبہ کے نام جاسر اور ذیب ہیں۔جاسر کے بھائی اور ذیب کے چچا کے بیٹے عوض آل راکہ نے میڈیا سے گفتگو کرتے ہوئے بتایا کہ دونوں نوجوان گزشتہ پانچ برس سے سکالر شپ پر سول انجینئرنگ کی تعلیم حاصل
کر رہے تھے اور آئندہ دو ہفتوں کے دوران وہ فارغ التحصیل ہونے والے تھے۔ دونوں طلبہ فارغ التحصیل ہونے اور وطن واپس لوٹنے کے انتظار کے سبب گزشتہ تین برس سے اپنے گھر والوں سے نہیں مل سکے تھے البتہ جاسر اور ذیب کا اپنے گھر والوں سے آخری رابطہ ان کی وفات سے دور روز قبل ہوا تھا۔عوض کے مطابق دونوں متوفی نوجوانوں نے جاسر کے ایک بھائی کو بھی اپنے ساتھ چلنے کو کہا تھا تاہم وہ دوسری ریاست میں اپنے دوستوں کے ساتھ گریجوایشن کی خوشیاں منانے کے سبب نہیں جا سکا۔
