اسلام آباد(مانیٹرنگ ڈیسک) شہباز شریف کی اہلیہ تہمینہ درانی کا اپنے شوہر کی حکومت ختم کرنے پر سکھ کا سانس ، شہباز شریف کے دور اقتدار کو پریشان کن بھی قرار دیدیا۔ تفصیلات کے مطابق پنجاب پر مسلسل دس سال حکومت کرنے والے شہباز شریف کی اہلیہ نے حکومت کی مدت ختم ہونے پر سکھ کا سانس لیتے ہوئے سماجی رابطوں کی ویب سائٹ ٹویٹرپر اپنے جاری پیغام میں کہا ہے کہ ’’خدا کا شکر ہے کہ یہ سب پورا ہوا، تہمینہ درانی نے شہباز شریف کے دور
اقتدار کو کافی پریشان کن بھی قرار دیا۔ ان کاکہنا تھا کہ شہباز شریف گھر میں بھی سب کو کام پر لگا دیتے ہیں یہاں تک کہ کچن میں بھی ان کی رفتار کا کوئی مقابلہ نہیں۔تہمینہ درانی نے اپنے ٹویٹ میں شہباز شریف کے ہمراہ خوشگوار موڈ میں اپنی ایک تصویر بھی شیئر کی ہے۔ واضح رہے کہ رات 12بجےپا کستان کی تاریخ میں دوسری حکومت اپنی 5 سالہ آئینی مدت پوری کرنے کے بعد ختم ہو گئی جس کے ساتھ ہی قومی وصوبائی اسمبلیاں اور وفاقی کابینہ بھی تحلیل ہو چکی ہیں۔
