اسلام آباد(مانیٹرنگ ڈیسک) پرویز مشرف کی تاحیات نا اہلی کے خلاف اپیل سماعت کیلئے مقرر، چیف جسٹس آف پاکستان جسٹس ثاقب نثار کی سربراہی میں 3 رکنی بینچ 7 جون کو کیس کی سماعت کرے گا۔ تفصیلات کے مطابق سابق صدر و آرمی چیف پرویز مشرف کی تاحیات نا اہلی کے خلاف اپیل سماعت کیلئے مقرر کر دی گئی ہے اور چیف جسٹس آف پاکستان جسٹس ثاقب نثار کی سربراہی میں 3رکنی بنچ 7جون کو کیس کی سماعت کرے گا۔ سپریم کورٹ کی جانب سے اس حوالے سے پرویز مشرف اور اٹارنی جنرل کو نوٹسز بھی جاری کر دئیے گئے ہیں۔
واضح رہے کہ سابق صدر جنرل (ر) پرویز مشرف کو پشاور ہائیکورٹ نے الیکشن 2013 سے قبل تاحیات نااہل قرار دیا تھا جس کے خلاف انہوں نے 2016 میں سپریم کورٹ میں اپیل دائر کی تھی۔4 اپریل 2016 کو سپریم کورٹ نے پرویز مشرف کی تاحیات نااہلی سے متعلق پشاور ہائیکورٹ کے فیصلے کے خلاف اپیل سماعت کے لیے منظور کر لی تھی۔سماعت کے بعد عدالت نے اٹارنی جنرل کو نوٹس جاری کرتے ہوئے کیس کی سماعت غیر معینہ مدت تک کے لیے ملتوی کر دی تھی جو اب 7 جون 2018 کو سماعت کے لیے مقرر کی گئی ہے۔
