اسلام آباد (این این آئی) صوبائی وزیرقانون پنجاب رانا ثنااللہ نے کہا ہے کہ اگرناصرکھوسہ ذمہ داری سنبھالنے کوتیارہوئے تو نوٹیفکیشن ہوجائیگا۔ جمعرات کو صوبائی وزیر قانون رانا ثنااللہ سابق وزیراعظم نواز شریف کے ہمراہ لاہور سے اسلام آباد پہنچے اور اپنے قائد کے ساتھ احتساب عدالت میں پیش ہوئے۔اس موقع پر میڈیا سے گفتگو کرتے ہوئے وزیرقانون پنجاب رانا ثنااللہ نے کہا کہ پی ٹی آئی والوں کا یہ مستقل رویہ ہے کہ وہ فیصلہ پہلے کرتے ہیں اور سوچتے بعد میں ہیں۔صوبائی وزیر قانون نے کہا کہ اگر
پی ٹی آئی کم از کم یہی کرلیتی کہ ناصرکھوسہ سے درخواست کرتی کہ آپ اپنانام خود واپس لے لیں، انہوں نے کہا کہ مشاورت کا عمل مکمل ہو چکا،نگراں وزیر اعلی پر پی ٹی آئی جیسی غیر سنجیدہ جماعت کے ساتھ دوبارہ مشاورت نہیں ہو سکتی۔رانا ثنااللہ نے کہا کہ افسوس کی بات ہے کہ پاکستان تحریک انصاف دیانتداربیوروکریٹ اور ان کے اہل خانہ کے لئے پریشانی کاسبب بنی، اوراگرناصرکھوسہ ذمہ داری سنبھالنے کوتیارہوئے تو گورنرنوٹیفکیشن جاری کر دینگے ورنہ معاملہ الیکشن کمیشن کو ہی جائیگا۔
