اسلام آباد (مانیٹرنگ ڈیسک) عدالت میں گواہ کہہ رہے ہیں کہ کچھ غیر قانونی نہیں مگر میڈیا پر یہ رپورٹ نہیں ہو رہا، کیا آپ لوگوں کو بھی کیسز کی کچھ سمجھ آرہی ہے؟عمران خان جس تھالی میں کھاتا ہے اسی میں چھید کرتا ہے ، ایک خاندان کی حرمت دائو پر لگانے کے بعد چھپ کر بیٹھ گیا اس خاندان کے بچے وضاحتیں دے رہے ہیں، اس شخص نے پورے خاندان کو میڈیا کی توپوں کے
سامنے بٹھا دیا، اگر کوئی ایسی حرکت ہے تو سامنے آکر قوم کو کھل کر بتائو، نواز شریف کی احتساب عدالت میں پیشی کے موقع پر کمرہ عدالت میں صحافیوں سے گفتگو، کمرہ عدالت سے باہر کپتان کو بھی آڑے ہاتھوں لے لیا۔ تفصیلات کے مطابق نواز شریف آج اپنی صاحبزادی مریم نواز کے ہمراہ احتساب عدالت میں پیش ہوئے اس موقع پر کمرہ عدالت میں صحافیوں سے مختصر سی گفتگو میں نواز شریف نے صحافیوں سے استفسار کیا کہ آپ کو کیا کیسز کی سمجھ آرہی ہے جس پر صحافیوں کا کہنا تھا کہ گواہوں کے بیانات قلمبند ہو رہے ہیں جس پر وہاں موجود مریم نواز کا کہنا تھا کہ گواہ تو کہہ رہے ہیں کہ کچھ غیر قانونی نہیں ہے۔ نواز شریف کا کہنا تھا کہ گواہ تو ہمارے حق میں گواہی دے رہے ہیں مگر یہ میڈیا پر رپورٹ نہیں کیا جا رہا، کمرہ عدالت سے باہر صحافیوں سے گفتگو کرتے ہوئے نواز شریف نے کپتان کو آڑے ہاتھوں لیتے ہوئے ان کی مبینہ تیسری خفیہ شادی سے متعلق گفتگو کرتے ہوئے کہا کہ عمران خان جس تھالی میں کھاتا ہے اسی میں چھید کرتا ہے ، اس شخص نے ایک خاندان کی حرمت دائو پر لگا دی ہے اور ا س خاندان کے بچے وضاحتیں دیتے پھر رہے ہیں، یہ شخص خود تو چھپ کر بیٹھ گیا ہے جبکہ پورے خاندان کو میڈیا کی توپوں کے سامنے بٹھا دیا ہے۔ اگر کوئی ایسی حرکت ہے تو قوم کے سامنے آکر کھل کر بتائے۔
