لاہور (مانیٹرنگ ڈیسک) مقامی عدالت نے فوج مخالف بیان دینے پر وفاقی وزیر ریلوے خواجہ سعد رفیق پر اندراج مقدمہ کی درخواست پر فریقین کے وکلاء کو بحث کیلئے طلب کرلیا ۔ ایڈیشنل سیشن جج منور احمد نے سول سوسائٹی کی رکن آمنہ ملک کی درخواست پر سماعت کی ۔جس میں سی سی پی او لاہور اور ایس ایچ او سول لائن کو فریق بناتے ہوئے موقف اپنایا گیا کہ خواجہ سعد رفیق نے فوج کی کمانڈ کے بارے میں بیان دیا جسے فوج کے شعبہ تعلقات عامہ نے غیر ذمہ دارانہ بیان قرار دیا
ہے، خواجہ سعد رفیق کا بیان قابل دست اندازی جرم ہے اس لیے وفاقی وزیر کیخلاف اندراج مقدمہ کی درخواست دی مگر افسوس کہ پولیس اندراج مقدمہ کی درخواست پر کوئی کارروائی نہیں کر رہی اور ابھی تک پولیس نے مقدمہ درج نہیں کیا ۔ لہٰذا معزز عدالت سے استدعا ہے کہ پولیس کو وفاقی وزیر خواجہ سعد رفیق کیخلاف مقدمہ درج کرانے کا حکم دیا جائے۔عدالت نے درخواست پر مزید کارروائی 20 جنوری تک ملتوی کرتے ہوئے فریقین کے وکلاء کو بحث کے لئے طلب کر لیا ۔
