اسلام آباد۔۔۔خیبر پختونخوا حکومت نے بلدیاتی انتخابات کرانے کیلئے الیکشن کمیشن کو باقاعدہ درخواست کر دی ہے۔ الیکشن کمیشن کو بھجوائی گئی درخواست میں کہا گیا ہے کہ الیکشن کمیشن جلد از جلد صوبے میں بلدیاتی انتخابات کروائے۔ الیکشن کمیشن نے خیبر پختونخوا میں تین مراحل میں انتخابات کرانے کا فیصلہ کیا ہے۔ صوبے کو سیکورٹی کی بنیاد پر برفانی، شہری اور دیہی علاقوں میں تقسیم کیا گیا ہے جن میں مرحلہ وار انتخابات کرائے جائیں گے۔ خیبر پختونخوا میں بائیو میٹرک سسٹم کا استعمال صرف تحصیل غازی کی حد تک ہوگا۔ ذرائع کا کہنا ہے کہ آئندہ سال جنوری میں بلدیاتی انتخابات کے شیڈول کا اعلان کر دیا جائے گا جبکہ مارچ کے آخر میں خیبر پختونخوا میں بلدیاتی انتخابات متوقع ہیں۔