لاہور (مانیٹرنگ ڈیسک) مقامی عدالت نے پہلی بیوی سے اجازت لئے بغیر دوسری شادی کرنے پر شوہر کو 6ماہ قید اور 2لاکھ روپے جرمانے کی سزا سنا دی۔ گزشتہ روز جوڈیشل مجسٹریٹ سید علی جواد نقوی نے بغیر اجازت دوسری شادی کرنے کے مقدمہ کی سماعت کی۔درخواست گزار شاہدرہ ٹاؤن کی رہائشی خاتون نے موقف اختیار کیا کہ اس کے شوہر شہزاد ثاقب نے اجازت کے بغیر دوسری شادی کر لی ہے جو کسی طور
درست اقدام نہیں ہے لہٰذا معزز عدالت سے استدعا ہے کہ عدالت سپریم کورٹ کے فیصلے کی روشنی میں فیصلہ جاری کیا جائے ۔ جبکہ خاتون کے شوہر کے وکیل نے عدالت کو بتایا کہ دوسری شادی کے لیے اسے اجازت لینے کی ضرورت نہیں،اسلام نے اسے چار شادیاں کرنے کا اختیار دے رکھا ہے۔ فاضل عدالت نے دلائل سننے کے بعد خاتون کے شوہر کو چھ ماہ قید اور دو لاکھ روپے جرمانہ ادا کرنے کی سزا سنا دی۔
