اسلام آباد(نیوز ڈیسک) پنجاب حکومت تمام ان شہروں میں جہاں تھیٹر ڈراموں کی آڑ میں بیہودہ رقص ہوتا ہے ان پر پابندی لگانے پر غور کر رہی ہے۔ذرائع کے مطابق لاہور میں سرکاری ڈرامہ ہالوں الحمراءمیں گزشتہ دنوں چند معیاری اور صاف ستھرے ڈرامے فیملیز کے لئے دکھائے گئے جن کو فیملیز سمیت عوام کی کثیر تعداد نے سراہا۔چنانچہ اس تجربے کو مد نظر رکھتے ہوئے دیگر نجی ڈرامہ ہالوں میں بھی رقص پر پابندی لگانے پر غور کیا جارہا ہے۔سنجیدہ حلقوں کا کہنا ہے کہ رقص پر پابندی سے تھیٹر ہالوں میں معیاری ڈراموں اور فیملیز کی زیادہ سے زیادہ شرکت کو فروغ ملے گا۔اس سلسلے میں اداکار سہیل احمد ،قوی خان،علی اعجاز،مسعود اختر،انور علی ،امان اللہ،خالد معین بٹ اور دیگر بہت سے فنکاروں نے حکومت پنجاب اور ضلعی حکام کے اس فیصلے کو سراہتے ہوئے جلد از جلد اس پر عملدرآمد کرنے کو کہا ہے۔ ان فنکاروں کا کہنا ہے کہ تھیٹر ذرائع ابلاغ کا ایک ذریعہ ہے اور اس سے معاشرے کو سدھار نے کے لئے تفریح کے ہمراہ بہت سا کام لیا جاسکتاہے۔موجودہ حکومت کو تھیٹر ڈراموں کے علاوہ ملک بھر میں چلنے والی رقص کی سی ڈیز اور ان کا مختلف چینلز پر چلانے پر بھی پابندی عائد کرنا چاہئے۔