دبئی(اینا ین آئی)متحدہ عرب امارات کے دارالحکومت ابو ظہبی کے پراسیکیوٹر جنرل نے ایک اماراتی نوجوان کو عبرت کا نشان بنانے کے لیے جنونی انداز میں گاڑی چلانے کی پاداش میں تین ماہ تک سڑکیں اور پبلک پارک صاف کرنے اور 17 ہزار درہم کی سزا سنائی ہے۔عرب ٹی وی کے مطابق یہ سزا قانون مجریہ 2016ء کی دفعہ 7 کے تحت سنائی گئی ۔ابو ظہبی کی عدالت کی طرف سے ایک نوجوان کو غیر قانونی طور پر گاڑی
چلانے، نمبر پلیٹ کے بغیر گاڑی سڑک پر نکالنے پر تین ماہ تک سڑکوں اور پارکوں میں جھاڑو دینے کے ساتھ ساتھ سترہ ہزار درہم جرمانہ کیا گیا۔ اگلے تین ماہ تک اس کا ڈروائیونگ کا لائسنس بھی ضبط کرلیا گیا ہے۔خاکروبی کی سزا پانے والے نوجوان پر الزام ہے کہ اس کی تیز بارش اور موسم کی خرابی کے باوجود جنونی انداز میں اپنی کار چلانے کی کوشش کی تھی جس کے نتیجے میں اس کی اور دیگر شہریوں کی زندگی خطرے میں پڑ گئی تھی۔خیال رہے کہ ابوظہبی کی کسی مقامی عدالت کی طرف سے کسی شہری کو سڑکیں صاف کرنے کی سزا اپنی نوعیت کا پہلا واقعہ ہے تاہم حالیہ ایام میں دبئی کے حکمران الشیخ محمد بن راشد آل مکتوم نے پرخطر ڈرائیونگ کرنے اور بعض دیگر خلاف قانون اقدامات پر سڑکیں صاف کرنے کی سزائوں کا حکم دیا تھا۔گذشتہ برس ابوظہبی نے ایک نیا قانون منظور کیا تھا جس کے تحت کم درجے کے جرائم میں ملوث افراد کو سماجی سروسز کی شکل میں سزا دینے، گرفتار کرنے، چھ ماہ تک قید اور جرمانہ یا تمام سزائیں ایک ساتھ دینے کی منظوری دی تھی۔ اس قانون کی منظوری کے بعد یہ پہلا موقع ہے جب عدالت نے ایک نوجوان کو بے ہنگم طریقے سے گاڑی چلانے پر سڑکیں اور پارک صاف کرنے کی سز سنائی ہے
