سری نگر (مانیٹرنگ ڈیسک)مقبوضہ کشمیر کے علاقے اکھنور میں بھارتی فوجی کیمپ پر حملے میں 3فوجی ہلاک ہو گئے۔ ہندوستان ٹائمز کے مطابق نامعلوم حملہ آوروں نے مقبوضہ کشمیر کے علاقے اکھنور میں جنرل ریزرو انجینئر فورس کے اہلکاروں پرفائرنگ کردی جس کے نتیجے میں 3جوان مارے گئے۔ جنرل ریزرو انجینئر فورس بھارت میں سرحد پر سڑکوں کی تعمیر اوربحالی کا کام کرتا ہے۔ مرنے والے تینوں اہلکار جنرل ریزرو انجینئر فورس کے ساتھ کام کر رہے تھے۔
بھارتی حکام کا کہنا ہے کہ 2سے تین حملہ آوروں نے جوریان کے علاقے میں کیمپ پر دھاوا بولا اور اندھا دھند فائرنگ کر دی جس سے کیمپ میں کھلبلی مچ گئی۔ حملے کے بعد بھارتی فوج نے علاقے کا محاصرہ کر لیا ہے اور دونوں جانب سے فائرنگ کا سلسلہ جاری ہے۔ یاد رہے گزشتہ سال نومبر میں بھی جموں کشمیر کے علاقے میں بھارتی فوجی کیمپ پر حملے میں 2میجرز سمیت 7بھارتی فوجی مارے گئے تھے ۔

موضوعات:بھارت مقبوضہ کشمیر