قاہرہ(این این آئی)مصر کے شورش زدہ علاقے جزیرہ نما سیناء میں سخت گیر جنگجو گروپ داعش کی مقامی شاخ انصار بیت المقدس سے وابستہ جنگجوؤں نے اپنی روایتی سفاکیت کا مظاہرہ کرتے ہوئے ایک سو سالہ صوفی بزرگ الشیخ سلیمان یبو حراز کا سرقلم کردیا ۔میڈیارپورٹس کے مطابق انصار بیت المقدس کے جنگجوؤں نے الشیخ سلیمان یبو حراز کو سینا میں واقع شہر العریش میں ان کے مکان کے باہر سے ان کی اولاد کے سامنے بندوق کی نوک پر اغوا کر لیا تھا اور پھر ان کا سرقلم کرنے کی تصاویر انٹر نیٹ پر جاری کردی ہیں۔مقتول جزیرہ نما سیناء میں سب سے عمر رسیدہ صوفی بزرگ تھے۔داعش نے ان پر جادو ٹونے کا عمل کرنے کے الزامات عاید کیے ہیں اور ان کے اسی ”جْرم” پر اپنی فوری انصاف کی خود ساختہ عدالت سے سزائے موت سنائی اور پھر تلوار سے ان کا سرقلم کردیا ہے۔