ملتان(مانیٹرنگ ڈیسک)سابق وزیر خارجہ اور تحریک انصاف کے سینئروائس چئیرمین شاہ محمود قریشی نے بھارتی وزیر خارجہ سشما سوراج کو مقبوضہ کشمیر جا کر اٹوٹ انگ کے نعرے لگا کر دکھانے کا چیلنج کردیا۔شاہ محمود قریشی کا کہناہے کہ بھارتی وزیرخارجہ کو چیلنج کیا کہ سشما سوراج مقبوضہ کشمیر جا کر اٹوٹ انگ کا نعرہ لگا کر دکھائیں، میں آزاد کشمیر میں جا کر کشمیر بنے گا پاکستان کے نعرے لگا تا ہوں ۔ بھارتی وزیرخارجہ نے نے اقوام متحدہ میں مقبوضہ کشمیر کو اٹوٹ انگ قرار دیا جو کہ دنیا کے آنکھوں میں دھول جھونکنے کے مترادف ہے،ساری دنیا جانتی ہے کہ مقبوضہ کشمیر اقوام متحدہ کا نا مکمل ایجنڈہ ہے۔ملتان میں میڈیا سے گفتگو کرتے ہوئے شاہ محمود قریشی نے کہا کہ سرجیکل اسٹرائیک کے بھارتی دعوے کا پول کھل گیا ۔سرجیکل اسٹرائیک سے بڑا ڈرامہ نہیں رچایا جاسکتا۔انہوں نے کہا کہ سندھ طاس معاہدہ ختم کرنابھارت کی سب سے بڑی حماقت ہوگی۔پاکستان کے لئے ہم ایک ہیں۔ملکی مفاد میں تحریک انصاف ہرتعاون کریگی ۔انہوں نے کہا کہ ملکی مفاد میں حکومت نے کنٹرول لائن کی صورتحال پراجلاس بلایا ہے۔ وزیر اعظم کی زیر صدارت پارلیمانی اجلاس میں شرکت کروں گا جس میں بھارت کے عزائم کے حوالے سے پارلیمانی لیڈرز کو بتاؤں گا۔انہوں نے مزید کہا کہ پاکستان کے لئے تمام اختلافات بھلادئیے ہیں۔ ملکی مفاد کے لیے تحریک انصاف ہر قسم کے تعاون کے لیے تیار ہے۔بھارتی جارحیت کا علم ہونے پرواہگہ بارڈرپہنچ کر جوانوں کا حوصلہ بلندکیا۔ایک سوال کے جواب میں انہوں نے کہا کہ تحریک انصاف حکومت کی آنکھ میں آنکھ ڈال کر بات کررہی ہے۔

موضوعات:پاک بھارت کشیدگی