کابل(این این آئی)بھارتی وزیراعظم نریندرمودی نے ویڈیو لنک کے ذریعے افغانستان کے صدر اشرف غنی کے ہمراہ کابل میں قدیم قصر دارالامان کی دوبارہ تزئین و آرائش کے بعد مشترکہ طور پر اس کا افتتاح کردیا۔افغان میڈیا کے مطابق اس موقع پر ویڈیو لنک سے خطاب کے دوران وزیراعظم نریندر مودی نے افغانستان کے ساتھ دوستی جاری رکھنے کے عزم کا اظہار کرتے ہوئے کہا کہ بھارت اور افغانستان دل و دماغ سے قریبی دوست ہیں۔انہوں نے کہا کہ بھارت کے 1 ارب 25 کروڑ عوام امن کی خاطر افغانستان کے ساتھ ہیں اور مستقبل میں بھی کام کرتے رہیں گے۔بھارتی وزیراعظم نے کہاکہ مشترکہ حکمت عملی افغانستان میں ترقی کی علامت ہے اور ہندوستان مستقبل میں بھی افغانستان کے ساتھ ہمیشہ کام کرتا رہے گا۔افغان صدر اشرف غنی نے تاریخی محل کی بحالی میں مدد کرنے پر بھارتی وزیراعظم کا شکریہ ادا کرتے ہوئے کہا کہ ہم بھارت کی حکومت اور عوام کے دل کی گہرائیوں سے شکر گزار ہیں کہ انہوں نے دکھ سکھ میں ہمیشہ ہمارا ساتھ دیا۔ان کا کہنا تھا کہ بھارت اور افغانستان کے درمیان دو طرفہ تعلقات قائم ہو رہے ہیں۔یاد رہے کہ اس سے قبل گذشتہ برس ہندوستان اور افغانستان کے سربراہان مملکت نے ہرات کے مقام پر 30 کروڑ ڈالر کی لاگت سے بننے والے فرینڈ شپ ڈیم کا افتتاح کیا تھا، گذشتہ سال دسمبر میں ہندوستان کی جانب سے افغانستان کو پارلیمنٹ کی عمارت بھی بطور تحفہ تعمیر کرکے دی گئی۔بھارت، افغانستان کی تعمیر و ترقی اور انسانی ہمدردی کی مد میں مزید 1 کروڑ ڈالر امداد کرے گا۔ یہ کسی بھی جنگ زدہ ملک کے لیے سب سے بڑا عطیہ ہوگا۔