لاہور ( این این آئی) قومی کرکٹ ٹیم کے سابق فاسٹ بولر راولپنڈی ایکسپریس شعیب اختر نے انکشاف کیا ہے کہ عمران خان نے 2ماہ قبل تیسری شادی کرنے کے حوالے سے بتا یا تھا اور کہا تھا کہ اب میں تیسری شادی کروں گا اور اس کو کامیاب بھی بناؤں گا ۔عمران خان کی تیسری شادی کی خبریں میڈیا پر آنے کے بعد نجی ٹی وی سے گفتگو کرتے ہوئے شعیب اختر نے کہاکہ چند ماہ پہلے ہم ایک ریسٹورنٹ میں بیٹھے تھے کہ عمران خان نے بتایا کہ میں اب تیسری شادی کروں گا جس پر میں نے کہا اس سے اچھی خبر کوئی اور ہو ہی نہیں سکتی ۔ انہوں نے کہاکہ عمران خا ن بہت پختہ عزم رکھتے ہیں اور وہ جو کہہ دیتے ہیں اس کو کر کے چھوڑتے ہیں ۔ عمران خان کبھی ہارنے کے لئے نہیں کھیلتے اور وہ کسی بھی کام کے لئے تن من کی بازی لگا دیتے ہیں ۔ انہوں نے کہاکہ عمران خان اپنے بچوں کو بڑا مس کرتے ہیں اور ان کو ملنے کے لئے بھی جاتے ہیں اور آج کل بھی لندن میں بچوں کو ہی ملنے گئے ہیں ۔ شعیب اختر نے کہا کہ دعا کرتا ہوں کہ ان کو اچھا جیون ساتھی مل جائے جو ان کو اوران کے بچوں کو سنبھال سکیں۔ اللہ کرے ان کی تیسری شادی کامیاب ہو۔

موضوعات:شعیب اختر