نئی دہلی(این این آئی) بھارت آئندہ ماہ چابہار بندرگاہ کی ترقی اور انفراسٹرکچر کے لیے 150 ملین ڈالر کی ریل کی پٹریاں اور ریلوے سے متعلق دیگر سازوسامان برآمد کر ے گا، ریل کی پٹریاں بھارتی سٹیل کمپنیوں کی طرف سے بھیجی جائیں گی، پہلی کھیپ آئندہ ماہ جولائی میں ایران کو برآمد ہو گی۔بھارتی میڈیا کے مطابق گزشتہ ماہ وزیراعظم نریندر مودی کے دورہ ایران کے دوران چابہار بندرگاہ کی ترقی اور دیگر بنیادی ڈھانچے کے معاہدوں پر دستخط کیے گئے تھے، انہیں معاہدوں کے تناظر میں بھارتی سٹیل کمپنیاں ایران کیلئے 150 ملین امریکی ڈالر مالیت کی ریلیز برآمد کریں گی۔بھارت کے نزدیک چاہ بہار بندرگاہ ایک اہم اسٹریٹجک اہمیت کی حامل ہے جو انہیں پاکستان کو بائی پاس کر کے افغانستان اور یورپ تک رسائی دے گی۔ روڈ ٹرانسپورٹ اور ہائی ویز کے بھارتی وزیر نتن گڑ کری اور ایرانی سفیر کے درمیان ایک ملاقات ہوئی ہے، بھارتی وز یر نے بتایا کہ بھارت ایرانی بندرگاہ پر صنعتوں کے قیام میں اربوں ڈالر کی سرمایہ کاری کر یگا ٗ یہ صنعتیں المونیم پگھلانے کے کارخانوں سے یوریا پلانٹس پھیلی ہوں گی ، اس کے علاوہ بھارتی ریلوے چابہار میں افغانستان تک سامان کی منتقل کیلئے ایک ریلوے لائن تعمیر کرے گی جو کراچی کی بندرگاہ کے متبادل ہو گی اور ایرانی بندرگاہ کے ذریعے چاروں طرف زمین سے گھرے افغانستان تک بھارت کو رسائی دے گی۔