بغداد(این این آئی)عراقی کردوں نے بغداد حکومت کو پیشکش کی ہے کہ اگر وہ انہیں ماہانہ بنیادوں پر ایک ارب ڈالر ادا کرنے کا وعدہ کرے تو یہ کرد اپنے علاقوں سے عراقی خام تیل کی برآمد میں اضافے پر تیار ہو جائیں گے۔ میڈیارپورٹس کے مطابق عراقی حکومت نے رواں برس مارچ سے کرد علاقوں سے پائپ لائن کے ذریعے خام تیل کی برآمد روک دی تھی۔ تیل کی اس برآمد سے ہونے والی آمدنی پر بغداد حکومت اور خود مختار عراقی کردستان کے درمیان تنازعہ پایا جاتا ہے۔ کرد پائپ لائن سے عراق کا سرکاری ادارہ نارتھ آئل کمپنی بحیرہ روم میں ترک بندرگاہ جیہان تک یومیہ ڈیڑھ لاکھ بیرل خام تیل پہنچا رہا تھا۔ اِس پائپ لائن کے ذریعے کرد بھی اپنے علاقے سے خام تیل جیہان پہنچاتے ہیں۔