نئی دہلی(نیوز ڈیسک)بالی ووڈ کوئین انوشکا شرما اور بھارتی کرکٹ ٹیم کے سٹار بیٹسمین ویرات کوہلی کے درمیان معاشقے کی خبروں کے بعد ان کے ’’بریک اَپ ‘‘ کی خبروں نے میڈیا پر خوب دھوم مچائی اور کہا گیا کہ ویرات کوہلی انوشکا سے شادی کرنا چاہتے تھے مگر انوشکا نے اپنے فلمی کیر ئیر کو بچانے کے لئے کوہلی کو شادی سے انکار کیا جس کی وجہ سے دونوں کے درمیان اختلافات پیدا ہوئے اور ان کی ’’پیار کہانی ‘‘بھی اختتام کو پہنچی ۔مگر انوشکا شرما اور ویرات کوہلی کے درمیان ’’بریک اَپ‘‘ اور اختلاف کی وجہ’’ شادی‘‘کی جلدی نہیں بلکہ ’’پیسہ ‘‘ تھا ۔ بھارتی میڈیا کے مطابق انوشکا شرما کے ایک قریبی دوست کا کہنا ہے کہ ویرات کوہلی نے انوشکا شرما کی فلم ’’بمبئی ویلوٹ‘‘میں اپنی ’’معشوقہ‘‘ کے اصرار پر 40کروڑ کی خطیر رقم اس آس پر لگائی تھی کہ ’رنبیر کپور ،کرن جوہر اور انوشکا شرما ‘ کی یہ فلم ہٹ ہو گی اور ویرات کوہلی کو بڑا منافع کمانے کا موقع ملے گا، مگر 120کروڑ کی لاگت سے بننے والی یہ فلم نہ صرف بری طرح فلاپ ہوئی بلکہ محض 24کروڑ کا ہی بزنس کر سکی ، اور بھارتی کرکٹر کو نہ صرف بڑی رقم سے ہاتھ دھونا پڑے بلکہ رقم کی واپسی کے تنازعہ پر انوشکا شرما نے اپنے ’’عاشق بھارتی کرکٹر‘‘ کو کھری کھری سناتے ہوئے اس سے ناطہ ہی منقطع کر لیا ۔واضح رہے کہ انوشکا کے ساتھ ’’بریک اَپ ‘‘ کے بعد ویرات کوہلی نے سوشل میڈیا پر نہ صرف انوشکا شرما کو طعن و تشنیع کا نشانہ بنا کر اپنے دل کی بھڑاس نکالی بلکہ میڈیا کے سوالات پر کئی مرتبہ بھڑک اٹھے ۔