اسلام آباد (نیوز ڈیسک): ملک میں آبادی کے تیزی سے بڑھتے ہوئے رجحان سے نمٹنے کے لیے وفاقی حکومت نے 16 رکنی نیشنل پاپولیشن کونسل تشکیل دے دی ہے۔
اس حوالے سے باضابطہ نوٹیفکیشن بھی جاری کر دیا گیا، جس کے مطابق کونسل کی سربراہی وزیراعظم شہباز شریف کریں گے۔
جاری کردہ نوٹیفکیشن کے مطابق کونسل میں چیف آف ڈیفنس فورسز فیلڈ مارشل سید عاصم منیر، چاروں صوبوں کے وزرائے اعلیٰ، وزیراعظم آزاد جموں و کشمیر اور وزیراعلیٰ گلگت بلتستان کو بھی رکن نامزد کیا گیا ہے۔
اس اعلیٰ سطحی فورم میں وفاقی وزیر خزانہ، وزیر منصوبہ بندی، وزیر صحت، وزیر تعلیم، وزیر قانون، وزیر اطلاعات اور وزیر مذہبی امور بھی شامل ہوں گے تاکہ آبادی سے متعلق قومی پالیسی پر مشترکہ حکمت عملی اختیار کی جا سکے۔
حکومتی اعلامیے کے مطابق کونسل سال میں کم از کم دو اجلاس منعقد کرے گی، جبکہ وزارت منصوبہ بندی و ترقی اس کے سیکریٹریٹ کے طور پر فرائض انجام دے گی اور کونسل کے فیصلوں پر عملدرآمد کی نگرانی بھی اسی وزارت کی ذمہ داری ہوگی۔
کونسل کا بنیادی مقصد ملک میں آبادی کے بڑھتے ہوئے دباؤ کو مدنظر رکھتے ہوئے ایک مؤثر، دیرپا اور قابلِ عمل قومی حکمت عملی تیار کرنا ہے، جس کے ذریعے وفاق اور صوبوں کے درمیان بہتر رابطہ اور پالیسی پر مؤثر عملدرآمد یقینی بنایا جا سکے۔
نوٹیفکیشن میں کہا گیا ہے کہ نیشنل پاپولیشن کونسل عوام میں شعور اجاگر کرنے، آبادی سے متعلق قومی اتفاقِ رائے پیدا کرنے اور اس مہم میں علمائے کرام، سول سوسائٹی، نجی شعبے اور دیگر متعلقہ اداروں کی شمولیت کو بھی فروغ دے گی۔
مزید برآں، کونسل آبادی سے متعلق حکومتی اقدامات پر عملدرآمد کے دوران پیش آنے والی رکاوٹوں کا جائزہ لے گی، ان کے حل کے لیے سفارشات مرتب کرے گی اور ایسی پالیسیوں کی تشکیل میں کردار ادا کرے گی جن سے ملک میں آبادی کے متوازن اور پائیدار انتظام کو یقینی بنایا جا سکے۔
