ممبئی (نیوز ڈیسک) بالی ووڈ اداکارہ ودیا بالن نے کہا ہے کہ بالی ووڈ میں پہلے کے مقابلے میں اب بڑی عمر کی اداکاراؤں کو قبول کرلیا جاتا ہے کیونکہ اب فلموں میں ہر طرح کے کردار موجود ہوتے ہیں۔ ایک انٹرویو میں ودیا بالن نے کہا کہ اب 30 سال اور اس سے زائد عمر کی اداکاراؤں کیلئے شوبز میں کافی کچھ تبدیل ہوچکا ہے، آج کل ہر قسم کی فلمیں بنائی جارہی ہیں جن میں ہر طرح کا کردار شامل ہے۔ انہوں نے کہا کہ بالی ووڈ کا ایک دور تھا جب صرف رومانوی کہانیاں بنائی جاتی تھیں ، مرد اداکار کتنی بھی بڑی عمر کے ہوں ، اداکارائیں ہمیشہ چھوٹی عمر کی نظر آتی تھیں تاہم اب یہ تبدیل ہوچکا ہے لوگ خواتین کو ہر عمر میں قبول کررہے ہیں۔ شادی سے پہلے مانتی تھی کہ شادی کے بعد فلموں کی آفرز میں کمی آجائیگی تاہم مجھے آج بھی بہت سی فلموں کیلئے آفرز ہو رہی ہیں ۔ انہوں نے کہا کہ جلد نئی فلم تین میں امیتابھ بچن، نواز الدین صدیقی کے ہمراہ کام کرتی نظر آئینگی۔