آگرہ: فیس بک پر اپنی منفرد اور عجیب و غریب تصاویر لگانے کا رواج نوجوانوں میں اتنا عام ہوگیا ہے کہ وہ اس کے لیے جان پر کھیل جاتے ہیں ایسا ہی کچھ ہوا بھارت میں جہاں 3 نوجوان سیلفی لینے کے شوق میں موت کے منہ میں چلے گئے۔

پولیس کے مطابق 4  دوست  دہلی سے آگرہ تاج محل کی سیر کے لیے نکلے اس دوران  ریلوے اسٹیشن پررک کر انہوں نے  تیزی سے آتی ٹرین کے سامنے کھڑے ہو کرسیلفی لینے کا سوچا، اس دوران 3 دوست ٹرین کو دور سے آتا دیکھ کر عین ٹریک کے درمیان آگئے اور انتظار کرنے لگے کہ ٹرین قریب آجائے تو  سیلفی لے کر فوری جمپ لگاکر ٹریک سے ہٹ جائیں  گے لیکن ان کی بدقسمتی کہیے کہ ٹرین کی رفتار ان کے اندازے سے کچھ زیادہ ہی تھی اور جیسے ہی ٹرین قریب پہنچی انہوں نے سلیفی لینے کے لئے  فون کو تیار کیا لیکن یہ لمحہ ان کے لیے موت کا پیغام لےآیا اور اس سے پہلےکہ وہ ٹریک سے جمپ لگاتے ٹرین نے انہیں کچل دیا اور تینوں موقع پر ہی ہلاک ہوگئے اور یوں لوگوں کو چونکا دینے والی تصویر لگانے کی خواہش ان کی موت کا باعث بن گئی۔

پولیس کا کہنا تھا کہ ہلاک ہونے والے دوستوں کو یعقوب، اقبال اور افضل کے نام سے شناخت کر لیا گیا ہے جب کہ ان کی عمریں 20 سے 22 سال کے درمیان تھیں