اسلام آباد: قومی ایکشن پلان پرعملدرآمد سے متعلق کمیٹی نے ملک کے تمام مدارس کو رجسٹریشن کا پابند بنانے کا فیصلہ کیا ہے۔
اسلام آباد میں وفاقی وزیر داخلہ چوہدری نثار علی خان کی سربراہی میں قومی ایکشن پلان پرعملدرآمد سے متعلق اجلاس ہوا، جس میں وفاقی وزیر مذہبی امور سردار محمد یوسف، شیریں مزاری، بابرغوری، قمر زمان کائرہ، رحمان ملک، افراسیاب خٹک اور فرید پراچہ کے علاوہ مذہبی جماعتوں و مدارس کے نمائندوں نے شرکت کی، اس موقع پر دہشت گردی کے خلاف قومی ایکشن پلان پر عمل درآمد کے حوالے سے امور کا جائزہ لیا گیا۔ اجلاس کے دوران مدارس اصلاحات اور دہشت گردوں سے روابط رکھنے والے مدارس کے حوالے سے تفصیلی مشاورت ہوئی۔
اجلاس میں ملک کے تمام مدارس کو رجسٹریشن کا پابند بنانے اور رجسٹریشن کے طریقہ کو آسان بنانے پر اتفاق کیا گیا، اجلاس میں فیصلہ کیا گیا کہ دہشت گردی میں ملوث ہر مدرسے کے خلاف کارروائی کی جائے گی۔