پیرس۔۔۔۔یورپ میں مشتبہ دہشت گردوں کی تلاش اور گرفتاری کے لیے کی گئی کارروائیوں کے بعد سکیورٹی انتہائی سخت کردی گئی ہے۔بیلجیئم، فرانس اور جرمنی میں بیس سے زیادہ مشتبہ مسلمان شدت پسندوں کو گرفتار کیا گیا ہے جبکہ فرانس کے بعد اب بیلجیئم بھی سڑکوں پر پولیس کے ساتھ ساتھ فوج تعینات کررہا ہے۔
پچھلے ہفتے پیرس میں رسالے چارلی ایبڈو کے دفتر سمیت دوسری جگہوں پر مسلح حملوں میں 17 افراد کی ہلاکت کے بعد یورپ کے کئی ملکوں نے سکیورٹی پہلے ہی سخت کررکھی تھی۔بیلجئم کی پولیس نے جمعرات کو چھاپوں کے دوران دو مشتبہ شدت پسندوں کو ہلاک اور پانچ افراد کو گرفتار کیا جن پر دہشتگرد گروپ کی کارروائیوں میں حصہ لینے کے الزام میں مقدمہ درج کیا گیا ہے۔دوسری جانب واشنگٹن میں امریکی صدر براک اوباما اور برطانیہ کے وزیر اعظم ڈیوڈ کیمرون نے امریکی اور برطانوی حکام کا مشترکہ گروپ بنانے کا اعلان کیا ہے تاکہ دونوں ملک ’پرتشدد شدت پسندی سے نمٹنے کے لیے مل کر کام کرسکیں‘۔
رہنماؤں کے مطابق یہ ٹاسک فورس چھ ماہ میں اپنی رپورٹ پیش کرے گی۔