اسلام آباد (نیوز ڈیسک) ملک میں جاری سیلابی صورتحال نے زرعی شعبے کو شدید نقصان پہنچایا ہے، جس کے نتیجے میں گندم کی قیمت میں ریکارڈ اضافہ دیکھنے میں آیا ہے۔ پاکستان کسان اتحاد کے چیئرمین خالد حسین باٹھ نے انکشاف کیا ہے کہ صرف تین روز میں گندم کی قیمت 2,100 روپے فی من سے بڑھ کر 3,500 روپے فی من ہو چکی ہے۔انہوں نے خبردار کیا کہ اگر یہی صورتحال برقرار رہی تو ملک میں گندم کی قلت پیدا ہوسکتی ہے اور روٹی کی قیمت 30 سے 40 روپے تک جا سکتی ہے۔

ان کے مطابق اس وقت 30 سے 35 ہزار دیہات سیلاب کی لپیٹ میں آچکے ہیں اور تقریباً 20 سے 25 لاکھ ایکڑ اراضی پر کھڑی فصلیں مکمل طور پر تباہ ہو چکی ہیں۔ماہرین زراعت کا کہنا ہے کہ گندم کے ساتھ ساتھ چاول، کپاس، سبزیاں اور لائیو اسٹاک بھی متاثر ہوئے ہیں، جس کے باعث آئندہ دنوں میں غذائی اشیاء کی قیمتوں میں مزید اضافہ متوقع ہے۔پنجاب کے مختلف اضلاع میں دریائے ستلج، چناب اور راوی میں آنے والے شدید سیلاب نے کپاس، دھان، مکئی، تِل اور چارے جیسی فصلوں کو تباہ کر دیا ہے جبکہ ہزاروں مویشی ہلاک ہو چکے ہیں۔ سیلابی پانی اب سندھ کی طرف بڑھ رہا ہے جہاں مزید زرعی نقصان کا خطرہ ہے۔پاکستان تحریک انصاف کے رہنما جمشید اقبال چیمہ نے کہا ہے کہ خریف کی تقریباً 20 فیصد فصلیں مکمل طور پر برباد ہو چکی ہیں۔

ان کے مطابق حکومت کو اس کے بعد پیدا ہونے والے بحران سے نمٹنے کے لیے ہنگامی منصوبہ بندی کرنی چاہیے، مگر اب تک کوئی واضح حکمت عملی سامنے نہیں آئی۔سیلاب سے متاثرہ اضلاع جیسے ملتان، جھنگ، چنیوٹ، وہاڑی، ساہیوال، اوکاڑہ، قصور، خانیوال اور لاہور میں فصلوں کی بڑے پیمانے پر تباہی ہوئی ہے۔ ابتدائی اندازے کے مطابق صرف اجناس میں 20 فیصد نقصان ہو چکا ہے جبکہ لائیو اسٹاک کی ہلاکتیں اس کے علاوہ ہیں۔ ماہرین کا کہنا ہے کہ اگر فوری اقدامات نہ کیے گئے تو ملک کو بدترین غذائی بحران اور قحط کا سامنا کرنا پڑ سکتا ہے۔